കൊച്ചി: കാസര്കോട് നിന്നും കാണാതായ പതിനഞ്ചുകാരിയെ ദിവസങ്ങള്ക്കു ശേഷം തൂങ്ങി മരിച്ച നിലയില് കണ്ടെത്തിയ സംഭവത്തില് കടുത്ത വിമര്ശനവുമായി ഹൈക്കോടതി. പൊണ്കുട്ടിയുടെ മാതാവ് സമര്പ്പിച്ച ഹേബിയസ് കോര്പ്പസ് ഹരജി ഡിവിഷന് ബെഞ്ച് പരിഗണിക്കവെയാണ് ഹൈക്കോടതിയുടെ പ്രതികരണം. പെണ്കുട്ടിയേയും അയല്വാസിയായ യുവാവിനെയും ഇന്നലെയാണ് തൂങ്ങിമരിച്ച നിലയില് കണ്ടെത്തിയത്.
ഒരു വിഐപിയുടെ മകളെയാണ് കാണാതായതെങ്കില് പൊലിസ് ഇങ്ങനെ ചെയ്യുമോ എന്നു ചോദിച്ച ഹൈക്കോടതി വിഐപികളും തെരുവില് താമസിക്കുന്നവരും നിയമത്തിനു മുന്നില് തുല്യരാണെന്നും കൂട്ടിച്ചേര്ത്തു. അസ്വാഭാവിക മരണത്തിന് കേസ് രജിസ്റ്റര് ചെയ്ത് അന്വേഷണം ആരംഭിച്ചതായി സര്ക്കാര് കോടതിയില് അറിയിച്ചു.
ഇന്നലെയാണ് കാസര്ഗോഡ് പൈവളിഗയില് പതിനഞ്ചുകാരിയെയും 42 കാരനായ യുവാവിനെയും തൂങ്ങി മരിച്ച നിലയില് കണ്ടെത്തിയത്. 26 ദിവസമായി കാണാതായിരുന്ന ഇരുവരെയും വീടിന് സമീപമുള്ള മൈതാനത്തിന് സമീപമുള്ള മരത്തില് തൂങ്ങിമരിച്ച നിലയിലാണ് കണ്ടെത്തിയത്.പ്രിയേഷ്-പ്രഭാവതി ദമ്പതികളുടെ മകള് ശ്രുതിയേയും അയല്വാസിയും ഓട്ടോ ഡ്രൈവറുമായ പ്രദീപിനെയുമാണ് മരിച്ച നിലയില് കണ്ടെത്തിയത്.
മണ്ടേക്കാപ്പ് മേഖലയിലെ ഗ്രൗണ്ടിന് സമീപമുള്ള മരത്തിലാണ് തൂങ്ങിയനിലയില് മൃതദേഹങ്ങള് കണ്ടെത്തിയത്. മൃതദേഹം കണ്ടെത്തിയ സ്ഥലത്തിന് സമീപത്ത് ഇരുവരുടെയും മൊബൈല് ഫോണുകള് ഉപേക്ഷിച്ച നിലയില് കണ്ടെത്തിയിരുന്നു. ഇതോടൊപ്പം ഒരു കത്തിയും കണ്ടെത്തിയിരുന്നു.
52 അംഗ പൊലിസ് സംഘവും നാട്ടുകാരും സന്നദ്ധ പ്രവര്ത്തകരും രാവിലെ മുതല് തിരച്ചില് നടത്തി. ഏഴ് പൊലീസ് സ്റ്റേഷനിലെ ഉദ്യോഗസ്ഥര് തിരച്ചിലില് പങ്കെടുത്തു. മൊബൈല് ഫോണ് ലൊക്കേഷന് കേന്ദ്രീകരിച്ചാണ് അന്വേഷണം നടന്നത്. ഫെബ്രുവരി 12നാണ് പെണ്കുട്ടിയെ കാണാതായത്. പുലര്ച്ചെ വീട്ടുകാര് ഉറങ്ങിക്കിടക്കുമ്പോള് പുറത്തുപോയ ശ്രുതിയെ കാണാനില്ലായിരുന്നു. ആദ്യം മൊബൈല് ഫോണ് റിംഗ് ചെയ്തിരുന്നെങ്കിലും പിന്നീട് സ്വിച്ച് ഓഫ് ആവുകയായിരുന്നു. അതേസമയം, അയല്വാസിയായ പ്രദീപിന്റെ ഫോണും അതേ ദിവസം തന്നെ സ്വിച്ച് ഓഫ് ആയതിനെ തുടര്ന്ന് കുടുംബം സംശയം പ്രകടിപ്പിച്ചിരുന്നു.
ശ്രുതിയുടെ കുടുംബം പിന്നീട് ഹൈക്കോടതിയില് ഹേബിയസ് കോര്പ്പസ് ഹര്ജി നല്കുകയും ചെയ്തിരുന്നു. അതിനിടെ, മൊബൈല് ടവര് ലൊക്കേഷന് അടിസ്ഥാനമാക്കി പൊലിസ് അന്വേഷണം തുടങ്ങി. കുമ്പള സിഐ വിനോദ് കുമാറിന്റെ നേതൃത്വത്തില് പ്രദേശത്ത് വ്യാപക തിരച്ചില് നടത്തിയിരുന്നു.
ഞായറാഴ്ച രാവിലെ, വീടുകള്ക്ക് സമീപമുള്ള വിജനമായ സ്ഥലത്ത് മരത്തില് തൂങ്ങി മരിച്ച നിലയില് ഇരുവരുടെയും മൃതദേഹങ്ങള് കണ്ടെത്തുകയായിരുന്നു. സംഭവത്തില് പൊലിസ് വിശദമായ അന്വേഷണം ആരംഭിച്ചിട്ടുണ്ട്.
Be the first to comment