ഹജ്ജ് അപേക്ഷ സമർപ്പിക്കാനുള്ള അവസാന തീയതി നാളെ, നറുക്കെടുപ്പ് ഒക്ടോബർ നാലിന്

കൊണ്ടോട്ടി: 2025 ലെ ഹജ്ജ് അപേക്ഷകരെ തിരഞ്ഞെടുക്കുന്നതിനുള്ള നറുക്കെടുപ്പ് ഒക്ടോബർ നാലിന് വൈകീട്ട് 3.30ന് നടക്കും. കേന്ദ്ര ഹജ്ജ് കമ്മിറ്റിയാണ് നറുക്കെടുപ്പ് നടത്തുക.
ഹജ്ജിന് അപേക്ഷ സമർപ്പിക്കാനുള്ള അവസാന തീയതി നാളെയാണ്. അപേക്ഷകർ കവർ നമ്പർ ലഭിച്ചുവെന്ന് ഉറപ്പുവരുത്തണമെന്ന് സംസ്ഥാന ഹജ്ജ് കമ്മിറ്റി അറിയിച്ചു. മുഖ്യ അപേക്ഷകന്റെ അപേക്ഷയിൽ രേഖപ്പെടുത്തിയ മൊബൈൽ നമ്പറിലേക്ക് എസ്.എം.എസ് ആയി കവർ നമ്പർ ലഭിക്കും. ഹജ്ജ് കമ്മിറ്റിയുടെ വെബ്‌സൈറ്റിൽ അപേക്ഷകരുടെ യൂസർ ഐ.ഡിയും പാസ്‌വേർഡും ഉപയോഗിച്ച് ലോഗിൻ ചെയ്തും പാസ്‌പോർട്ട് നമ്പർ എൻട്രി ചെയ്തും കവർ നമ്പർ പരിശോധിക്കാനാകും. കവർ നമ്പർ ലഭിക്കാത്തവർ ഒക്ടോബർ ഒന്നിന് അപേക്ഷാ ഫോമും അനുബന്ധ രേഖകളുമായി ഹജ്ജ് കമ്മിറ്റി ഓഫിസുമായി ബന്ധപ്പെടണം. ഫോൺ: 04832710717, 2717572.